Aizawl khawpui Smart City a puan a ni ve ta

India rama Smart City 30 puan zingah Aizawl khawpui a tel ve a, 27-na ah a lang. Inrinni khan Ministry of Urban Development leh Housing & Urban Poverty Allevation Minister M. Venkaiah Naidu chuan smart city atana thlante hming hi a puang a, hemi hma hian 60 puan tawh nen, Smart City atan Khawpui 90 thlan a ni tawh. Hmun ruak 10 la awmin, State 20 ten an inchuh ve leh dawn a ni. Aizawl khawpui Smart City-a thlan a nih chungchangah UD &PA Minister Pu Zodintluanga chuan Aizawl khawpui Smart City atana tling turin vawi 3 an tumnaah thlan an ni ve ta chu lawmawm a tih thu a sawi. he smart city hnuaiah hian scheme hrang hrang Health Sector, khawpui cheimawina tur leh khawpui tihchangkanna tur tam tak a keng tel tih sawiin, heng te hi Sorkarin tha taka hmanga mipuiten hma an lo sawn theihna atana hman theih ngei chu mipuite bakah sorkar pawhin a duh dan a ni angin tha taka sum lo kal chu hman an tum tih a sawi a ni. Smart City-a State 30 thlanchhuah te tan hian cheng Vbc 57,393 ruahman a ni a, heta tanga Vbc 46,879 chu Infrastructure Development atan hman a ni ang a, a bak Vbc 10,514 chu technology base hmasawnna hrang hrang -governance, service delivery leh utilization of infrastructure atan hman tura tih a ni.