Hausak chak lutuk vangin minister te chhui turin ti

BJP Mizoram Pradesh chuan Chief Minister Pu Lal Thanhawla leh Congress MLA 8-te sum neih a pung chak lutuk nia sawiin chhui chiang turin ACB-ah FIR an thehlut tih an sawi. BJP Mizoram Pradesh chuan, Congress Party hian Rorelna Dik tih thupui an nei a, Chief Minister-in eiruka an fihlim thu nasa taka a tlangaupui laiin an MLA te sum neih erawh a lêt engemaw zatin kum nga chhung lekin a pung a ni, Mipuiin an thlantlin MLA-te thil neih leh sum nasa taka a pun laiin mipuite erawh retheihna khurah an lut mek zel nia sawiin Mizoram BJP chuan hmasawnna chu MLA-te leh an vua leh vangteah chauh a thleng a ni, an ti. MLA-te thil neih pung nasa lutuk chu eiruk vangah an ngai tih sawiin BJP Mizoram chuan ACB-in chak taka chhui a, thil dik lo hmanga hausa MLA-te chungah dan anga action a lak ngei an beisei a, MLA hausa chak lutuk nia an hriat, chhui chiang tura ACB an ngen te chu - Chief Minister Pu Lal Thanhawla, Minister pahnih Pu John Rotluangliana leh Pu PC Lalthanliana, Parlia. Secy. 4 - Pu Hmingdailova Khiangte, Pu KS Thanga, Pu K. Lalrinthanga leh Pu H. Zothangliana, MLA 2 - Pu Lalrinmawia Ralte leh Pu Lalrobiaka te an ni.