Politics khelhna emaw ham\hat duh vang a ni lo
Lunglei 19th July, 2017 :: Mizoram sorkarin ramin hma a lo sawn lehzual nan leh hnamzia leh nunphungte chawikan nan mi zawng zawng tana a ruahman New Economic Development Policy (NEDP) hnuaia hmalakna chi khat ‘Business Plan Contest’ (Mizoram Kailawn) chu nimin khan I&PR Auditorium-ah Planning & Programme Implementation Minister Pu Lalsawta’n a hawng.
B-Plan Contest hawnna inkhawmah hian sorkar mi pawimawh ;leh sawm bikte an tel kim hle. ‘Mizoram Kailawn’ hawngtu Khuallian Planning Minister Pu Lalsawta chuan ramchhunga zirna in hlun berte zinga mi IIM Calcutta-Innovative Park mithiamte nen NEDP hnuaia entrepreneurship scheme-ah sorkar-in thawhhona a nei thei chu vanneihthlak a, NEDP kaltlangin mirethei leh tanpui tlakte tanpui zel a tum bakah NEDP hmangin Mizoram hmel tihdanglam leh bung thar kaipui a beisei a ni. Mizoram thalaite tan hna a vang tan tawh hle a, he harsatna sutkian nan NEDP chu kawng awmchhun leh thlanawm ber a ni tiin NEDP chu politics khelhna emaw politics lama hamthatna duh emaw vanga buatsaih a nih loh thu leh hei hi hun lo kal zel turah pawh chhawrnahawm tura ruahman a ni a ti. P&PI Secretary Dr.C.Vanlalramsanga chuan NEDP leh B-Plan Contest (Mizoram Kailawn) chungchang hrilfiahna hun hmangin Mizoramin hmasawnna bung thar a kai theih nan tanlak theihna apiangah sorkar chuan tanlak zel a tum a ni a ti. NEDP chuan zau leh kim thei ang berin hmasawnna kawng hrang hrang awm theite chu a huap dawn a, NEDP hnuaia ruahmanna hrang hrang kalpui dan tur (strategy) fel tak siam a nih thu a sawi. Tun dinhmunah Mizoramah lehkhathiam leh hnathawk thei mihring zat (educated & employable population) kum 15-59 inkar hi an tam hle a, sorkar hnain a daih dawn loh avangin skill development leh entrepreneurship lamah tanlak a pawimawh hle a, kawng awmchhun niin a lang bawk a ni a ti. NEDP hmalakna peng pawimawh ber pakhat Entrepreneurship Development Scheme (EDS)-in a tum ber chu sorkar hna ringawta innghat lova mahni kutkawih eizawnna kawng zawh thei tura mipui, a bik takin thalaite buatsaih a ni a; he Scheme kalpuinaah sorkar chuan mipui mamawh - kawlphetha, kawng, tui, khawpui leh thingtlang lam tichangtlun bakah hmalakna apiang uluk taka vil chu a tih tur pawimawhah a dah a. NEDP atan sorkar chuan kum 2016-2017 ah cheng vaibelchhe 250 leh kum 2017-2018 atan cheng vaibelchhe 750 a dah tih a tarlang bawk. NEDP hnuaia Entrepreneurship Development Scheme hi chhawng hniha kalpui tur a ni dawn a. A hmasa zawk, vawiina Planning Minister-in a hawn tak - ‘Business-Plan Contest (Mizoram Kailawn)’ - hi July ni 21, 2017 atangin online tan tur a ni a, an website www.mizoramkailawn.org-ah a duh apiang tan August ni 31, 2017 thleng entrepreneurship project thehluh theih a ni a; heng project lutte zinga tha thlanna result chu September ni 25, 2017-ah puan a ni ang a, heta tlingte tan Group Camp leh Training buatsaih a ni ang. A chhawng hnihna - Entrepreneurship Summit - hi October ni 10, 2017 ah neih a ni ang a, hetah hian B-Plan Contest Final Result puan a ni ang. 'Mizoram Kailawn' hawnna inkhawm hi I&PR Director Pi Lalnithangi'n lawmthu sawina hun hmangin a khar a. Hemi hnuah IIM Calcutta atanga lo kalte leh chanchinthar lakhawmtuten 'Press Meet' an nei zui nghal a ni.
0 comments:
Post a Comment