EDITORIAL)
Mi rethei zawkte tan Sorkar chuan ruahmanna thar siamin NLUP hun engemaw chen a kalpui hnuah SEDP a rawn siam leh a, mi harsa zawkten leirem rap a, hmasawnna kailawn a lawn tura rahbi an tuksak chuan Mizoram chhung hmun tam takah hmasawnna a siam ngei mai, chutihrual chuan a dawngtu mipui thenkhatte hian kailawna lawnna tur rahbi min siamsak mawlh mawlh chung pawhin pumpelh kan la zawng ta fo mai.
Sorkar hmalakna leh hmachhawp tam tak hlawhtlinna bul ber chu mipuite hi kan ni a, Nuai 50 theuh pawh sem sela, eizawnna bul tan nan leh taima taka tihtakzetna nena kan lo beih ve loh chuan mahni pumpui hnawhpuar nan mai maia kan lo hman ral chuan keimahni (mipuite) avang hian sorkar chak tak tur kha sorkar chak lo a nih phah ang a, ram hmasawnna daltu keimahni ngeikha kan nih laiin sorkar bawk puhmawhin a awm leh dawn a ni tih hria ila, keimahni avanga ram leh hnamin hma a sawn thei lo a nih chuan tunge mawhphur ang. Ram leh khawtlang piahlamah mi rethei te bawk hian mawh kan phur a, a phun ang nasa ber berah kan tang leh si ang tih a hlauhawm. Chuvangin sorkar kalsiam daltu nih loh hram tum teh ang u.
Chutihrual chuan, Sorkar pawhin ruahmanna tha elhkhen leh mirethei zawkte thlengphak tia au au lo hian a tak takin mi rethei te hnen hi kan ruahmanna tha tak tak tehian thleng mawlh teh se. Inthlan dawna kan in vaupum nasat ang chiah khan a takah pawh kan MLA tehi ram leh mipuite tan in vaupum reng rawh se, chu chuan ram a siamtha ngei ang.
Mite hnathawh leh tihtura buai reng mi tha leh dik an awm ngailo, mahni tihtura rinawm taka thawkte hi mi tha leh rinawm mi dik chu an ni mai zawk.
0 comments:
Post a Comment