Kum 2 atan contract thar ziak

Chelsea manager Antonio Conte chuan Stamford Bridge-ah kum hnih contract thar a ziak a, he a contract thar erawh tuna a contract neih mek chhunzawmna a ni lo. Nikum nipui lai khan Chelsea chuan Conte hi an lalut a, kum thum atan contract an ziak, Conte hian May thla khan Chelsea-a hun rei zawk cham a duh thu sawi mahse tun nipui bazara an hotute chet dan avangin Chelsea-a cham rei em em a chak vak tawh lo nia sawi a ni. Tuna a contract thar hi a nihna takah chuan a hlawh punna tiin sawi ila kan hrethiam mai awm e, tuna kum hnih contract thar a ziah hi a hlut zawng chu £19.2 million vel nia sawi a ni. "Chelsea ka zawm tirh atang khan duhsakna leh support tha tak ka dawng. Season khatnaah rim takin kan thawk a, tunah hian a aia nasaa kan thawh leh a ngai dawn a ni," tiin Conte chuan a sawi. Conte hian a season khatnaah Chelsea chu Premier League title a lakpui nghal a, Chelsea nuam a tih thu sawi thin mahse tuna a contract pawhsei zai an rel rih ta lo a ni