MFA Super cup a\angin Aizawl FC an tla

Nimin khan Lalbiakliana Memorial Mizoram Football Association Super Cup khelh chhunzawm a ni a, inkhel vawi thum awmin Mizoram Police FC, Chanmari West FC leh Dinthar FC te chuan ankhingpui theuh an hneh a, quarter final lut a hriat kim ta. Vawiin atangin AR Lammualah quarter final khelh tan tur a ni a, inkhel vawi hnih a awm ang a, chawhma dar 11:00-ah Bethlehem Vengthlang FC leh Chhinga Veng FC ten an khel ang a, chawhnu dar1:00 PM-ah Durtlang Leitan leh Venghlui FC ten an khel thung ang. Quarter Final lut te: 1. Bethlehem Vengthlang FC 2. Chhinga Veng FC 3. Durtlang Leitan 4. Venghlui FC 5. Aizawl FC Academy 6. Mizoram Police FC 7. Chanmari West FC 8. Dinthar FC Inkhel hmasaber Mizoram Police FC chuan 4-3 in Aizawl FC an hneh. First half hun tawp dawn injury time-ah Aizawl FC tan H Lalbiakthanga chuan goal hmahruai a khung a, Aizawl FC chuan 1-0 a hmahruaiin chawlh lawk an hmang. Second half tan atang a minute 3 aral hmain Rochharzela chuan Aizawl FC tan an goal hnihna a khung zui nghal a, Mizoram Police FC an bei dawng lo an siphurh sut ngei tum an nawr let thung a, minute 23 chhungin Lalsangbera chuan goal hnih a khung bakah Lalfakzuala leh F Lalrinpuia chuan goal khat ve ve an khung a, Mizoram Police FC chuan 4-2 in hmaanhruai ta zawk a, hun tawp dawn injury time-ah Mizoram Police FC defender Lalthanzaua chuan an lamah pet goal hlauh mahse, Aizawl FC chuan an siphurh an rul thei tawh lo a, Mizoram Police FC chuan 4-3 a hnehna an chang ta a ni. Inkhel vawi hnihnaah Chanmari West FC chuan 15-0 in Zauva Memorial FC an sawp thung. Chanmari West FC tan Lalnunmawia chuan goal nga a khung a, C Lalremruata leh R Lalthanmawia chuan goal thum ve ve khung bawkin JH Lallawmkima chuan goal hnih a khung bakah Laromawia leh Vanlalthlamuana chuan goal khat ve ve an khung bawk. Inkhel hnuhnungberah Dinthar FC chuan si thum faiin Ramthar Veng FC an hneh a, Dinthar FC tan Lalmalsawmtluanga, Lalnunsanga leh Lalramliana te chuan goal khat theuh an khung. First hlaf minute 34-ah Dinthar FC tan Lalmalsawmtluanga chuan goal hmahruai a khung a, goal dang lut Lo in Dinthar FC chuan 1-0 a hmahruaiin chawlh lawk an hmang a, second hlaf-ah Dinthar FC tan bawk minute 71-ah Lalnunsanga ( Tale-a) chuan an goal hnihna khungin huntawp dawn minute 1 pawh awm lo ah Lalrinliana chuan an goal thumna khung leh in Dinthar FC chuan 3-0 in hnehna an chang ta a ni.