Liverpool in Mohamed Salah la lut fel ta

Liverpool chuan Roma winger Mohamed Salah chu 39m euro (£34m) in an lalut fel ta a, Anfield-ah hian kum 5 daih contract a ziak. Egyptian kum 25 mi  Chelsea player hlui Salah hi tun nipui bazara Klopp-a no.1 target a ni. Kum 2014 khan Salah hian Liverpool a zawm teuh hle a hetih lai hian Chelsea chu £11m-in a zawm ta zawk a. Chelsea tan Premier League-ah vawi 6 chiah a start, loan-in Fiorentina leh Roma lamah kaltir a ni chhunzawm.Roma tan a khel tha hle a, nikum nipuiah khan Roma chuan Chelsea atangin £15m-in an lei ta a, season liamta khan Serie A-ah goal 15 khungin Roma chu pahnihna a nihpui a ni. Liverpool boss Jurgen Klopp chuan, "Kan team tichak tura kan mamawh tak kan la, ani kan la thei hi ka phur hle a ni. "Basle-a a khelh lai atang khan ka ngaiven tawh a, tunah chuan a puitling tawh a, player tha tak a ni. A chakin hmun thawl a siam thiam em em, attacking lamah nasa takin min tichak dawn a ni," tiin a sawi. Salah chuan, "Khang hunlai kha chuan naupang mai ka ni a, tunah chuan engkim a danglam tawh a ni," tiin Premier League-a a hun hmasa chungchang a sawi. Salah hian number 11 a ha dawn a, Firmino chuan number 9 a ha dawn ta a ni. Tun nipui bazarah Liverpool hian Chelsea striker Dominic Solanke an lei fel tawh a, ani hi Under-20 World Cup-a England champion puitu niin, top scorer a ni nghe nghe, July ni 1-ah Liverpool a zawm ang.