MFA Super Cup hmawrbawk hnai ta

Nimin khan Lalbiakliana Memorial Mizoram Football Association Super Cup quarterfinal chu AR Lammualah khelh tan a ni a, inkhel vawi hnih awmin Chhinga Veng FC leh Venghlui FC chuan an khingpui ve ve hnehin semifinal an lut. Vawiin hian inkhelh chhunzawm leh tur a ni a, inkhel vawi hnih a awm ang a, chawhma dar 11:00-ah Aizawl FC Academy leh Mizoram Police FC ten an khel ang a, chawhnu dar 1:00-ah Chanmari West FC leh Dinthar FC ten an khel ang. Nimina inkhelh hmasa zawkah ah Bethlehem Vengthlang FC leh Chhinga Veng FC te inkhelin a tantirh atangin team pahnih te an innawr tawn zak zak hnuah Chhinga Veng FC chuan an chance neih hmang tangkaiin minute 36-ah corner Dampuia pet chu K Lalthlahlova (Patea) chuan tauh goal-in an hmahruaina goal a khung a, Bethlehem Vengthlang FC chuan an siphurh sut tumin nawr let mahse goal erawh an thun mai thei lo. Chhinga Veng FC chuan 1-0 a hma an hruai ta. Second half-ah Bethlehem Vengthlang FC ten goal thun tumin bei ngial mahse, hun tawp thlengin an siphur an sut thei lo a, Chhinga Veng FC chuan 1-0 in hnehna an chang ta. Khelh hnuhnung zawkah Durtlang Leitan leh Venghlui FC te intum ve lehin Dirtlang FC chuan an chance neih hmang tangkaiin minute 12-ah Durtlang Leitan tan Alan Lalsawmzela goal shoot tha zet Venghlui FC keeper Vannunmawia namper chu Ramsangliana pet goal chu minute 4 aral hmain Venghlui FC tan Vanrammawia chuan a chhanglet nghal a, Venghlui FC chuan nawr chhunzawmin minute 2 chhungin SN Hmarsie leh K Roluahpuia chuan goal khat ve ve an khung a, Venghlui FC chuan 3-1 a hmahruaiin chawlhlawk an hmang ta a ni. Second half-ah Durtlang Leitan chuan nawr let ve bawk mahse, goal erawh an thun belh thei lo. Venghlui FC chuan an hun tha neih hmang tangkaiin minute 6 chhungin goal 4 lai a lut a, SN Hmarsie, Roluahpuia leh Joseph Lalchhandama chuan goal khat theuh an khung bakah, injury time-ah Zohmingthansanga chuan an goal khat khung leh in Venghlui FC chuan 7-1 in hnehna an chang ta a ni.