Ivan Perisic manah Man Utd leh Millan inrem

Ivan Perisic manah £40million-in Manchester United leh Inter Milan an inrem ta niin The Sun chuan a tarlang. Perisic chuan Manchester United zawm a duhthu a sawi nia report a ni a, America-a United tour nei mek chu Perisic hian a zawm dawn niin The Sun chuan a tarlang. Kum 28 mi Croatian midfielder hi Inter Milan chuan chhuah an phal nia sawi a nih laiin awlsam takin United chuan an lak a rinawm loh, Inter hian Perisic manah hian Martial lak tel an duh niin Italian chanchinbute chuan an tarlang. Perisic-a transfer thawnthu chu a tawp dawn ta nia ngaih a ni a, United hian kar khat chhungin £100,000 vel hlawhtir an tum nia report a ni bawk. United hian Romeleu Lukaku leh Victor Lindelof an lei fel tawh a, Jose chuan squad ti chak turin player pahnih khat lak leh an la tum thu a sawi a, Perisic hi Jose-a team-ah a tel ngei dawn ta niin a lang. Jose hian Chelsea midfielder Matic lak a la tum nia sawi a ni mek a, Matic hian Chelsea tour a zawm ve lo, Monaco midfielder Tiemoue Bakayoko chuan Stamford bridge a pan tak avangin Matic hi a chhuah mai a rinawm ta hle a ni. Jose chuan wing lama attacker tha tak a zawng reng thin a, Perisic hi a mamawh chhanna a ni tawh dawn nia report a ni a, the Sun in a tarlan dan chuan Perisic hian US-ah United a zawm anga, chutah chuan medical te neiin transfer an ti fel dawn a ni.