Mizoram khaw tinin kan tangkaipui em em chu P.A System (Public Address System) hi a ni awm e. Chhiat tawh, rikrum thil, Khawtlang hriattur pawimawh dang leh Pawl/Kohhran leh a hnuaia Fellowship ten member te hriattur kan puang thin a. Kan tangkaipui hle thin a nih hi. Chu chauh ni lovin Sorkar, sumdawng leh Public Service hrang hrang pawhin veng chhung information pekchhuahna hi an rawn hmang tangkai chho zel bawk a, hmasawnna tha tak a ni a, kan hmang zel ang.
Amaherawhchu, hetianga tangkai taka kan hman reng lai hian – a lutuk chin erawh kan thliar thiam loh chuan Inforamtion pawimawh tak tak karah khawtlang hmaimawkna leh mi thenkhat tana ri bengchheng / dam lo leh lung(heart) lam fello te tana thin ti phu leh ralkhela siamtu a ni thei tih erawh chu Pawl hrang hrang te leh a hmang tangkai thin tuten kan hriata, kan puan tir tur chin kan hriat a tul ta hle mai.
Tin, kan au chhan – a hretu tura kan duhte hi mi 100 em pawh an tlin loh va, Committee koh nan emaw, hnatlang thu puan tawh – in auhkhawm nan a hman fo te hian a concern ve lo, khawtlang mipui tam zawk leh veng thenawm tan ninawm leh ribengchheng mai a ni thei tih pawh hriat a tha hle. Tunlaiin Information tam tak chu kan mobile phone hmangin kan in hrilh zung zung thei ta a, Committee Kohna sem hman loh Emergency thil a nih pawhin Committee member 40/50 rual chin ang hi chu Phone Call/Massaging leh Group Media, etc. hmangin kan in dawr nghal zung zung thei a, hengte hi hmang tangkai viau tawh mah ila, rinrawlah kan neih thiam a tha lehzual hle mai.
PA system hman hun bi thliar thiam hi a pawimawh hle mai. Rikrum thil/Emergency thil chu a awm takmeuh mai. Chutih laiin thil nihpuhng pangngai leh kan puan thin tam tak chuan kan adjust theiin a rinawm. Entir nan - zing lamah dar 7-8 inkar vel, tlai lamah dar 5-7 vel hi lo ruahman ta ila, naktuka NREGS thawh tur te, Hnatlang tur te, Retailer thu leh hla te chu a hma tlai-ah puan lawk theihin dah ni se, zing lamah chuan zan lam programme puan tur awm te puan ni sela, hengtianga hunbi anga kan kalpui theih chuan mipui pawhin a hunbi atanga ngaihtuahin kan beng kan chhi tlang leh zualin a rinawm. Zan dar 9 hnu lama naktuk hnatlang han puan dum dum te hi a smart lo a, tul loah mi tam tak a ti ralkhelin Noise Pollution siam belhtu mai a ni.
Tin, thu puangtu hi an pawimawh hle mai. An thupuan fiah se la, an puan hma-in ziak chhuak sa vawi hnih/khat tal chhiar lawkin puang thin se. Chhiar sual leh lam sual hian information a pek chhuah te beng a titlai lutuk a, a thupuan pawimawhna aiin a tih sual lai khan mi a hruai bo palh ang tih a hlauhawm a, veng thenawmte nuihzatah kan veng kan chhuah mai palh a hlauhawm bawk. Hmanni-ah kan veng thenawm-ah chhiat tawh thu an puang a.. a puangtu-in thahnem a ngai bawk a, darkar chanve dawn – mitthi chungchang leh a kaihhnawih YMA member te hriat tur leh buhfai khawn dan tur te, thalaite zilh/fuihna a chham chiam mai a, veng dang – a lo hrevetu te tan chuan nuihzatthlak mai a ni a, thahnemngaih luatah veng a ti mualpho(?) der thei a ni. Information ni tawh lo thu tha tinreng infahna hmun tur a ni lo tih te pawh YMA hruaitute thlengin kan hriat hran a va hun em..!!
Lunglei-ah chuan Chanmari, Rahsiveng, Venglai, Electric veng leh Serkawn, Zohnuai, Zotlang te, Bazarveng te hi veng indawn tak mai, thupuan engkim inhre pawh deuh vek kan ni a, veng hrang hrang te hian kan aurinna kan hman dan te, kan bible chhiar te hi kan inhre tawn thei deuh fur mai. Chuvangin Lunglei khawpui veng hrang hrangte hian kan information puan thu-ah thil thui tak thlirin Veng chhung thil thleng ni mah se. Zan rei leh zing lutuk-a han puan em atan a pawimawh tawk em? Veng dang tam takin min hriatpui ve atan a him dam em tih te kan hriat a pawimawh hle.
A tlangpuiin khawtlang P.A System hi YMA enkawl a ni a, Kohhran leh a hnuaia Fellowship te, Khawtlanga Pawl (Association) hrang hrang te leh Sorkar Department thlengin kan hmang tangkai hi a lawmawm em em a. Chutih laiin thu puan tur pawimawh kan tih hi a in chen lo thei viau mai. YMA-a P.A incharge ten an hnial rem mang si lo, Donation emaw Fee emaw kan lo pek avanga, thu chhia/tha tinreng puan tir kan tum chuan a fuh lo thei hle bawk ang. Pawl tinte hian Vantlang Information-a puan awm a ni em, mipui benghriat-a puan zar atan a tul ber em tih te ngaihtuahin thupuan tur hi thliar hrang theuh ila, P.A System-a puan loh theih loh chin leh vantlang hriat awm hliah hliah kan tih chin chauh puan turin pe theuh ila chuan, tuna veng tina kan au ri chuah chuah hi a reh deuh duk ang a, thupuan pawimawh kan bengkhawn lehzual zawkin a rinawm.
– Hlima Ralte
0 comments:
Post a Comment