Ramri chinfel tumna tak takna an nei lo

ZNP Thalai President Lalmuanpuia Punte chuan sorkar kal tawh leh hrawn mek ten ramri chungchang tihtakzeta chinfel tumna an nei lo a ni a ti. Pu Lalmuanpuia chuan MNF sorkar laia Bangladesh nena ramri hung a nih chungchangah, Ramri hungtu Contractor pali te kha sorkar khan an hnathawh a enpui miah lo tih a chiang. Ramri ‘zero point’ atanga yard 150 - 500 a hung tur tih a nih laiin, zero point atanga Mizoram lam km 1-ah te, hmun thenkhatah chuan km 2-a hlaah ah te an remchan dan ang angin an hung a, MNF hian ramri chungchangah engmah sawi tur an nei ve lo a ti. Cachar nena ramri chungchangah ZNP Thalai President chuan Political party leh NGO ten vawiin thlenga Cachar nena ramri an pawm tlan chu Bengal Eastern Frontier Regulation, 1875 a ni a, Assam nena inrina chungchangah MNF leh tuna sorkar hrawn mek Congress hian tihtakzet a chinfel tumna an nei lo a, an sorkar laia MZP-te ‘Zo Run’ sak thiattute khan an thinglungah Vai hlauh hi a la reh thei lo. Ramri humhalh kawnga Vairengte mipui inpekna chu lawmawm a tih thu sawiin, a bik takin Auto Rickshaw driver-ten ramri humhalh kawnga tha an thawh dan chu fakawm a tih thu a sawi.