Russia in pelet turin phut

Nikum US president inthlan laia Russia inrawlh nia puh avanga America rama Russia palaite chenna hmun 2 America sorkarin a kharkhip tak chu Russia chuan thu delhkilh awm lova pe let tawh turin a phut. Kremlin spokesman Dmitry Peskov chuan, heng Russia palaite chenna in leh lo hi pe let tura America sorkarin thu delhkilh an phut chu pawm theih a ni lo tawp tih a sawi a, Foreign Minister Sergei Lavrov pawhin ram dang palaite in leh lo kharsak hi chhun pachanga inrawkna ang chiah a ni a ti bawk a ni. Nikum December thla khan khatih laia US President Barack Obama khan US president inthlan dawn vel khan Russia chuan Hillary Clinton tlin loh nan an lo inrawlh nia thuthang a awm tam avangin Russia palai 35 leh an nupui fanaute chu America ram atangin a hnawt chhuak a, an chenna in leh lo 2 chu an kharsak ta a ni. Mak tak maiin Russia President Vladimir Putin hian a thungrul ve duh tlat lo a ni. Russia sorkar thupuangtu  Mr Peskov chuan, US nen hian eng thu mah sawi fel tur kan nei ta lo, a ti a ni. US in a kharsak Russia palaite in leh lo pakhat chu Maryland Eastern Shore-a awm a ni a, US thuneitute chuan he inah hian inbiak pawhna lam thil changkang tak tak a awm teuh va, ram inenthlakna hmunpui atan an hmangah a puh a ni.