Gallery sak thar nen hian mi 21,000 vel an leng tawh ang.

Rajiv Gandhi Stadium, Mualpuiah mi 14,565 zet thut theihna tur gallery siam tum chu nimin khan Sports Minister Pu Zodintluanga leh Parlia. Secretary Pu Hmingdailova Khiangte-te chuan a hmunah an tlawh. July tawp atangin stadium sak belh hna hi thawh tan theih beisei a nih tur thu a sawi. Gallery ruangam hi France ramah siam zawh vek a ni dawn a, chu chu lawng hmanga India ramah thawn lutin Stadium hmunah an remkhawm chawp leh dawn a ni. Gallery hi metre 200 bawr vela sei a ni dawn a, mipui thutna hnuaiah hian 300sqm. a zau gym pakhat, 50sqm. a zau inthlakna pindan, hmeichhia leh mipa inthiarna paruk ve ve dah a ni ang. Modular gallery hi ni 180 chhungin peihfel hman tum a ni a, France ah kar (week) 13 an siam ang a, Mizorama phurh thlenna tur leh lehkha tihfel ngai tihfel chhung nen kar 8 bawr vel awh lehin Stadium-a gallery fit tak tak hun chhung hi chu kar 5 chauh a ni dawn niin Great Sports Infra-a Director (Sales) ni lai Pu Rupesh Tikku chuan a sawi. Gallery hnungah mihring kal theihna tur metre 3 vel zuah a ni ang a, Gallery siamsa innghahna tur foundation hi hmun 1500 ah an siam dawn a ni. RG Stadium modular gallery sakna tur hian sum cheng vaibelchhe 23.5 ruahman a ni. Tunah hian Rajiv Gandhi Stadium-ah hian mi 6000 leng vel gallery a awm mek a, Gallery sak thar nen hian mi 21,000 vel an leng tawh ang.